Home Habari Kuu Wawakilishi Wadi watakiwa kuwaelezea Wakenya manifesto ya Kenya Kwanza

Wawakilishi Wadi watakiwa kuwaelezea Wakenya manifesto ya Kenya Kwanza

0

Rais William Ruto ametoa wito kwa Wawakilishi Wadi wa muungano wa Kenya Kwanza kuelewa manifesto ya muungano huo ili wawaelezee Wakenya mashinani yaliyomo. 

Amesema serikali inatekeleza mipango kadhaa inayolenga kubadilisha maisha ya Wakenya. Alitoa mfano wa mbolea ya bei nafuu, afya kwa wote, nyumba za gharama nafuu na vituo vya teknolojia ya habari na mawasiliano miongoni mwa mipango mingine.

Akielezea kuwa baadhi ya wakulima hawajapokea mbolea ya bei nafuu kwa sababu hawajajisajili, Rais Ruto aliwataka Wawakilishi Wadi hao kuongoza zoezi la usajili wa wakulima katika wadi zao.

“Tutahakikisha kila eneo linapata mbolea ya kutosha. Lengo letu ni kuongeza uzalishaji wa chakula na kuangamiza baa la njaa,” aliongeza Rais Ruto.

Aliyasema hayo leo Jumatatu alipofanya mkutano wa mashauriano na Wawakilishi Wadi wa muungano wa Kenya Kwanza katika Ikulu ya Nairobi.

Naibu Rais Rigathi Gachagua, Magavana Ann Waiguru wa Kirinyaga, Cecily Mbarire wa Embu, Ken Lusaka wa Bungoma na Susan Kihika wa Nakuru ni miongoni mwa viongozi waliohudhuria mkutano huo.
Katika hotuba yake, Gachagua alitoa wito kwa Wawakilishi Wadi hao kufanya kazi pamoja na serikali kuhakikisha inatimiza ajenda yake ya maendeleo.
Pia aliwataka kupitisha sheria zitakazosaidia kuimarisha vita vya serikali dhidi ya pombe haramu.
Naye Waiguru aliwataka kuunga mkono mipango ya serikali mashinani.
“Kamwe hakutakuwa na serikali bora kuliko ile tuliyo nayo leo,” alisema Waiguru.
Martin Mwanje & PCS
+ posts