Home Habari Kuu Shirika la KBC kupeperusha matangazo yote ya serikali

Shirika la KBC kupeperusha matangazo yote ya serikali

Kisiang'ani alisema serikali imejitolea kufufua shirika la KBC kwa kuweka mfumo wa kisasa utakaohakikisha linakuwa shirika bora la utangazaji barani Afrika.  

0

Katibu katika wizara ya teknolojia ya habari na mawasiliano, Edward Kisiang’ani, ameagiza wizara zote,Idara na mashirika yote ya serikali, kutoa Matangazo yao kupitia shirika la utangazaji nchini Kenya,KBC  pekee.

Vile vile Katibu huyo aliagiza tume huru pamoja na vyuo vikuu vya umma kutoa matangazo yao kupitia  KBC baada ya kutolewa kwa idhini kutoka shirika la serikali la kuthibiti  matangazo, GAA.

Kwenye barua iliyoandikiwa tarehe saba mwezi Machi mwaka huu kwa  makatibu wote wa wizara na wakurugenzi wakuu wa mashirika ya serikali, tume huru na machansela wa vyuo vikuu vya umma,  katibu huyo alisema hatua hiyo ina-ambatana na azma ya serikali ya kupunguza gharama  na kuhakikisha utoaji  huduma  bora kwa gharama nafuu.

Kisiang’ani alisema mawimbi ya shirika la KBC yanafika  maeneo mengi na kwamba litawafaa vyema wale wanaotoa matangazo.

Kisiang’ani alisema serikali imejitolea kufufua shirika la KBC kwa kuweka mfumo wa kisasa utakaohakikisha linakuwa shirika bora la utangazaji barani Afrika.

Agizo hilo ilipongezwa na shirika la utangazaji nchini KBC, huku kaimu mkurugenzi wa shirika hilo akisema hatua hiyo itapiga jeki uwezo wa KBC wa kufahamisha umma maswala muhimu ya taifa.